ضاقت عليك دنيتك لما بقت مترين
وبعد قصر وحشم بقيت مع المساجين
ظلمت ليه العباد وجنيت على روحك
عامل مريض فى القفص! لكن مريض على مين؟
خربت ليه دنيتك وجنيت على نفسك
لا (العادلى) نفع ولا نفعك حشود حرسك
لا المال فى وقت الحساب ينفــع ولا حـتى الأولاد
ولا ناس كتير بهدلت فينا على حسك
ضيعت خير البلد على شلة المحاسيب
وقتلت ناس عضمهم كان باقى فى السراديب
لازم يكون الجزاء من جنس أعمالك
ويوم قصاص الإله راح يعمل إيه (الديب)
لا (الديب) هاينفع ولا نافعك يا (حسنى) أسود
ظلمك لنا وصّلك عند السنين السود
دخلت باب القفص انت و(علاء وجمال)
وقلت داخل القفص أنا هنا موجود
معادتش تنفع لكم توبة ولا استغفار
اللى ف إيدهم السماح فى مدافن الأحرار
روح هات جواب منهم ويقولوا فيه سامحوك
يا تروح على المشنقة وبعدين تروح النار
