عارف يا ريس العيب اللى كان إيه؟.. العيب إنك كنت ديكتاتور أوى!!.. عينيك مش شايفة الضعيف.. ويا ألف خسارة بتخاف م القوى.. سايب الغيلان تاكل فى لحوم البشر.. سايب الكبير يكبر ويظلم أوى.. سامح للديدان فى قلب الوطن تنتشر.. والفقير ينداس تحت مداس الغنى.. سايب ابنك يبيع ميراث قبل ما يورثه.. علمته إزاى يدهس الغلبان ويهرسه.. علمته البلطجة رغم صغر سنه.. أمرت الجميع يشوفه يبتسم ويضمه.. راضى إن الفقير لو مات ميلاقيش كفن. ولا حتى يلاقى قبر فيه يندفن.. والمريض فى مستشفيات الجبلى يترمى.. لحد ما يموت أو يصيبه العفن.. راضى إن العامل ميلاقيش ياكل.. رغم إنه شغال فى العتالة.. والوزير نازل طالع واكل.. وبيرمى اللحمة فى الزبالة.. راضى إن الراتب يا ريس.. مايكفيش حتى البقالة.. وشايف رجال أعمال يا ريس.. بيصرفوا ملايينهم فى الرذالة.. عارف يا ريس العيب كان إيه؟.. العيب إنك كنت ديكتاتور أوى!!.. شايف وراضى وساكت وقابض.. وناسى إن مهما زاد غناك.. جايلك ملك للروح قابض.. بكنوز العالم ما يتوارث معاك!!
