نفسى فى رمضان أنقل ميدان التحرير جوه بيتنا.. واعمل اعتصام بسبب استهلاكنا اللى بيزيد عن حاجتنا.. هو الصيام مش معناه تقل كل مصاريفنا وطلباتنا.. والا الصيام معناه مصاريف وأعباء زيادة على ميزانيتنا.. وليه فى الصيام تلاقى الأسعار زادت على سهوة.. والناس الغلابة تعانى من تجار الظلم والقسوة.. الصيام هو الإحساس بالفقير والبعد عن الشهوة.. مش سهر الناس وشرب الشيشة والشاى على القهوة... ولو بناكل خمس أرغفة فى الصيام ناكل رغيفين.. ولو بندخن علبة سجاير فرصة نبطل التدخين.. مش كل حاجة أكل وشرب كأننا طول السنة جعانين.. والمفروض بعد الصيام رب الأسرة يوفر قرشين.. الصيام يا ناس ضبط حواس ونكون كلنا راضيين.. وإن عشنا كده طول عمرنا نبقى كده فاطرين.
