أنا طول حياتى.. عاشق وهايم.. بوحّد فى دايم.. وأمشى فى أرضك.. وألفلف وأدور.. حافظ حيطانك.. وريحة غيطانك.. وحافظ دروبك.. وف لحظة غروبك.. بتطلع بدور مسحراتى.. وامشى ف شوارع.. وامشى ف زقاق.. آكل كوارع أكل رقاق.. عارف الملامح.. وقلبى مسامح.. وحافظ الوجوه.. ومين يا صبية.. يعشق ترابك.. وفيكى يتوه؟!..
مسحراتى.. أنا طول حياتى.. عاشق عيونك.. وربى يصونك.. وعمرى يا طاهرة.. ما أفكر أخونك.. أروح المطارح.. دا حبك وطارح.. فى قلبى بذور.. مسحراتى.. وماشى ليكى بغنى.. دا أنا غصب عنى.. رمشك سحرنى.. يا حلوة دا انتى.. أميرة البحور.. مسحراتى.. وطبلة ف إيدى.. وماشى أرن.. لو رحتى بعيدى.. تكتر جروحى.. وقلبى وروحى إليكى يحن.. ترابك سماكى.. نيلك هواكى وحبة حبة.. الله محبة.. شوفى نصيبك.. هلالك نصيبك.. ولا عين تصيبك.. شوفى حبيبك قلبه بحبك مزهزه بنور.. مسحراتى.. أنا طول حياتى.. ماشى فى أرضك.. بلفلف وأدور.
