يا عم محمد يا عم جرجس يلاَّ نفرح بثورتنا.. يلاَّ نبنى ويلاَّ نعمر يلاَّ نتباهى بمصريتنا.. يعنى إيه مسلم مسيحى؟ إحنا إخوات بخلاف ديانتنا.. ما نخليش حد يفرقنا ما تتحكمش فينا عصبيتنا.. ما تيجى نفكر شوية مين هيستفاد من فرقتنا؟.. مين هيتعب قوى لما يشوف بعنيه وحدتنا؟.. الجواب واضح وصريح بقايا نظام كان هيموتنا.. كان بيحب عذابنا ويموت قهر من وحدتنا.. سلفى إخوانى كاثوليك أرثوذكس حقنا نتباهى بانتماءاتنا.. بس مش على حساب نفسنا ولا ندوس يوم على كرامتنا.. يلاَّ بينا مع بعض نقضى على أعداء أمتنا.. نبنى ونزرع مصر نعلى اقتصادنا وثروتنا.. اللى ماتوا ف التحرير ذنبهم يا ناس فى رقبتنا.. استشهد المسلم والمسيحى مش هى دى أخلاق ثورتنا.. ضحوا بأرواحهم فدانا يبقى ده جزاهم من ناحيتنا..
الدين لله والوطن للجميع والاختلاف ما يفسدش قضيتنا.. يلاَّ بقى نبهى ونتفاخر ونحكى للعالم حكايتنا.. إزاى محمد حما الكنيسة وجرجس مات فداء لسمعتنا.. هى دى يا دنيا أخلاقنا وهو ده ميثاق مبادئنا.. طول عمرنا عايشين مع بعض وآخر الليل تحلى لمتنا.. ف الحزن دايما مع بعض وف الفرح بنكمل سعادتنا.. يلاَّ بقى نوقف مصر على رجلها ونعلى هامتها.. تعالى يا حره ف حضننا كلنا ولادك يا محروستنا.. هى دى مصر العروبة وربنا جعل النيل هبتنا.. خلاص محمد ف حضن جرجس ورجعت لنا تانى ضحكتنا.
قنا- دشنا - أبومناع غرب
