تسمع كتير أغرب كلام.. من ناس تقول خلاص سيبوه.. قال إيه بحجة الاحترام.. طب يبقى فين الاحترام.. لما الكبير خلى المدام.. بدون سبب تمسك نظام.. ويبان عليه التكتكة والاحتشام.. ولسه داء العند فيه مستغربين!..
بتوع يناير يسألوه.. متر الوطن بعتوه بكام.. وإزاى وليه إن الفقير.. وابن الفقير.. يبات جعان؟..
وإزاى ينام.. وإزاى وطن يرخص يهان.. عشان المدام وابن المدام.. وإزاى حقوقه يخدها ريح.. ومالوهشى حق الاعتصام.. كان فين ضميرك يا بطل.. إزاى تحس بالأمان.. وإزاى تنام.. ويعنى إيه ترضى المدام.. وترمى الحلال فوق الحرام.. وإنت فوق جبل غرور.. قايل أمان الشعب نام.. مع إنه فاتك شىء أكيد.. العدل مش إنشا وكلام.. تلاتين سنة بتخمنا.. عايش تمص فى دمنا.. وكلاب حراسة تلمنا.. وإنت بإيديك بتسمنا.. تلاتين سنة كنت إنت أكبر همنا.. بنصرخ نقول بلاش حرام..
لسه فينا الاحترام.. ولسه جوانا الوطن.. عمر الوطن ما كان نظام.. الوطن لحظة أدان.. الوطن قلب الميدان.. وعيال تحس بالأمان.. الوطن مش بس حكم وصولجان.. لو مرة واحدة تفهموا.. يعيش نظام.. ويموت نظام.. والوطن هو الإمام!!
لو يفهموا معنى الكلام! بيقولوا قال إحنا بشر.. أنا دخلى إيه بضعف النفوس!
بيقولوا الزمان عايز كتير.. وأنا دخلى إيه بحب الفلوس!.. بيقولوا قال مضحوك عليه.. وأنا دخلى إيه بشلة تيوس.. ميعرفوش كلمة حرام.. عايز ترجمة للعدل والاحترام.. الترجمة عند المدام!!
شلقام - بنى مزار
