مش عايزين نقول إن مبارك كان واكلها بس حاميها.. مش عايزين نقول كان راجل وشاكم البلد.. مش عاوزين نقول ولا يوم من أيامك يا مبارك!.. كده أعداء الثورة هايشمتوا فينا ويرجعونا للفساد اللى إحنا كنا نايمين واكلين شاربين منه!..
وبرضه مش عايزين نظرية المؤامرة والأجندات الخارجية لأنه لو الأجندات الخارجية لم تلق أرضاً خصبة من التطرف لفشلت مخططاتها.. يا جماعة لازم ننزل الشارع ونغير أفكار المغيبين الجاهلين بحقيقة الدين الإسلامى.. لازم تقولوا لهم إن المسيحيين إخوات لنا فى الإنسانية، وبرضه أهل كتاب بيعبدوا الإله الواحد، وهم أصحاب البلد معانا مش غرب، وكل واحد فينا له صاحب وجار وزميل مسيحى، وقدرنا نعيش مع بعض، مش لازم كل واحد يغير التانى علشان يعيش معاه، لكم دينكم ولى دين.. يا ناس فوقوا لنفسكم.. فوقوا للبلد..
ابنوا اقتصادها وعمروا الأرض واجعلوا مصر فى المقدمة دائماً، وعلوا القيم الجميلة بيننا زى المحبة والأخوة والإخلاص والأمانة والعدل والتعاون والاحترام والحرية.. كده البلد هاتتقدم وتصير كالنمور الآسيوية!.. بالذمة مش غيرانين من الدول اللى سبقتنا وإحنا كنا سابقينهم.. طول ما إحنا غرقانين فى بركة المسلم والمسيحى عمرنا لا هنشوف تقدم أو استقرار!
