أمل
يبقى الحجر صوان ومحالة ييجى فى جنب
تبص تلفت عنيك وتقول دا ينطق؟ صعب!
تصبر تكون كلمته نبعه وورده ودرب... وعجبى
نظرة
عاملنى زى البشر وكفاية تتغابى
واعطف عليّا بقى هو إحنا فى غابة؟
الكرسى ولّا العيش يا سلطة غلابة... وعجبى
سفه
قال السفيه للغبى أنا أغبى منك وأجهل
أنا كنت عارف حقيقتى وصممت ما أخجل
عيبى وعميت عنه لحد ما استفحل... وعجبى
هدم
لو هدوا بيت الولى على راس مريدينه
وضاع أمان الكنيسة والعبد خان دينه
فدا زمان الجهالة وأبالسة سايدينه... وعجبى
وصاية
مين عينه فى الأرض يا خلق مين خلّاه
يمشى كدا بالعرض يفسد فى خلق الله
ما ترد لو فى رد ولا انت صوت وآداه... وعجبى
كفاية
سواد القلب لو سبناه ونتبناه يهد الصبر
دا ضيّع كام سنة م العمر وخلى الحلو يطرح مر
كفاية دا التاريخ إنتم ولو هنتم يهون العمر...وعجبى
ديرب نجم ــ أبوعبدالله
