قلبى معاك يا «عصام» وسهرت أدعيلك
ودعيت بجاه النبى تفضل على حيلك
واقف فى وش الفساد سهران بنبوتك
وإحنا معاك فى الميدان بنقيد قناديلك
قلبى معاك والشباب على البلد سهران
صاحى بسيفه همته واعى لكل جبان
من يوم ما طرد الحيتان وهدم بيوت الديب
يحرم عليه النعاس قبل النهار ما يبان
قلبى معاك والطريق واقفين على بدايته
هانسير عليه بالعمل ونمشى لنهايته
ومهما طال الطريق معاك رجال أبطال
ومعاك عزيمة شباب رافع معاك رايته
قلبى معاك والوطن إحنا اللى راح نبنيه
ونهد جحر الثعالب اللى سكنت فيه
ونهد صرح الفساد اللى بقاله سنين
يخطف وينهب وعندى دليل إدانة عليه
قلبى معاك يا «شرف» وإحنا معاك أشراف
هانرجع اللى اتسرق ونحاكم الأجلاف
وكل لص واخوه ممسوك معاه شيلته
وشيخ عموم اللصوص طلع جبان خواف
قلبى معاك لأجل نبنى تمثال لكل شهيد
فيه الأمل فى الحياة قوة لفجر جديد
دم الشهيد يا وطن روى غيطان الخير
دم الشهيد يا وطن لوَن زهور العيد
