أهلا ومرحباً برجل الشرطة عدم وجودك سبب ورطة
تعال نبدأ صفحة بيضة وبلاش نكرر نفس الغلطة
أهلا بيك لنشر الأمان رجل الشرطة بشر إنسان
إيديك فى إيدى نحمى مصر وبلاش الصورة بتاعة زمان
أخى الضابط ممنوع الانتظار السرعة فى الخير مالهاش رادار
عوض غيابك احمِ بلدك من اللصوص من الأشرار
الكل عارف الوضع صعب وناس كتيرة كانت فى رعب
تعالوا نكمل أضلاع المثلث الجيش والشرطة مع الشعب
وجود بلطجة بشكل علنى إفادة واضحة لوضع أمنى
كسر الإشارة دى مخالفة وكسر العزلة واجب وطنى
يا رجل الشرطة ممنوع الوقوف عن العمل رغم الظروف
مصر ليها حق عليك تحمى المواطن من أى خوف
يا رجل الشرطة ممنوع الدخول فى أى حوار- مطلوب نزول
اشتاق الشارع لوجودك بس التعامل يكون بالأصول
يا ولاد مصر فى الداخلية حقى عليك وحقك علىَّ
احترامى ليك أمر واجب وخوفك علىَّ أجمل هدية
تعالوا نطبق أى قانون على أى واحد مهما يكون
نفطر عدالة نتعشى مساواة ولو كان غدانا فول باللمون
مع احترامى لازم اعتذار ولازم وعد مفيش تكرار
الشرطة حصن أمان للشعب والفاتحة لشهدائنا الأبرار
جهاز الشرطة عزة وكرامة بوجوده يحصل أمن وسلامة
تعرف إمتى أكون مرتاح لما الضابط يدفع غرامة
القاهرة
