يعدد الحكام العرب والغباء واحد.. تتعدد صور الفساد والقمع واحد.. نفس الأسلوب وكأنهم جميعا يقرأون من نفس الكتاب «كتالوج إدارة الشعوب _ كيف تصبح مخلوعاً فى أقل من شهر».
كل حاكم عربى فاكر نفسه بارم ديله ومقتنع تماماً بأن الوضع فى بلده تحت السيطرة وإنه مش زى غيره.. مصر مش زى تونس.. واليمن مش زى مصر.. والبحرين مش زى اليمن اللى مش زى مصر... وليبيا طبعا مالهاش زى.
كلهم بيفكروا بنفس الطريقة، إيه المشكلة لما يموت كام ألف واحد فى سبيل إنقاذ العرش.. نفس السيناريو الفاشل بيتكرر فى كل الدول العربية... التعامل الأمنى الصرف، العودة إلى ما قبل التاريخ عن طريق قطع الاتصالات والإنترنت، الإعلام المضلل ومظاهرات التأييد.
فى الأول تتسم لغة خطاب الحاكم للشعب بالتكبر والعند.. «بلاش دوشة وهو ده اللى عندى».. وفى الآخر «لقد فهمتكم» أو لو كان لسه مافهمش زى مبارك «يحز فى نفسى ما يفعله بعض بنى وطنى» بس لحد دلوقتى إرادة الشعب بتنتصر فى النهاية.. ومع ذلك يصر بقية الحكام العرب على نفس «الغشومية» بدون أن يتعلمو لذلك قررت إنى ألخص الدروس المستفادة للإخوة الحكام العرب الموجودين حاليا، المخلوعين مستقبلا... يمكن يفهموا:
1) يجب الاطلاع على تاريخ صلاحية الأسلحة قبل شرائها... ماتسترخصش.. تجنبا للفضايح.
2) بلاش تضرب فى كل الاتجاهات.. بمعنى أدق... ركز فى اتجاه أو شخص واحد تلبسه المؤامرة... مش لازم ترضى جميع الأذواق... يعنى يا تقول الإخوان يا تقول أمريكا يا تقول إسرائيل يا تقول إيران... مش كلهم سوا.. خليك فاهم مش حافظ.
3) أى عدد يزيد عن المليون لا يعتبر «قلة» خصوصا لو وصل لـ 8 ملايين.. واحسبها إنت.. تتخلع ولا يتقال عليك مابتعرفش تعد.
4) ماتديش أى فرصة للإعلام إنه يبتكر من دماغه ويخترع سيناريوهات فكسانه ماتطلعش من عيل فى كى جى تو.. إنت عايز تخوف الشعب مش تضحكه.
5) استخدم سياسة الطناش المطلق ولا كأن فيه حاجة بتحصل فى البلد.... صدقنى ده ممكن يزود فترة حكمك 18 يوم كاملين.
6) بلاش تسحب البوليس.. ولو كان لابد تسحب حاجة.. اسحب قرشين من البنك.. لأن البنوك بتكون قافلة طول أيام المظاهرات وجايز تحتاج تشترى سجاير ولا حاجة.
7) قناة الجزيرة قناة مغرضة.. والتاريخ أثبت إنها مستقصدة كل الدول الديمقراطية زى مصر وليبيا واليمن والبحرين وحتى إسرائيل.. أكل عيشها بقى تقول إيه!!
8) قطع النت والاتصالات حوار قديم ومش بيجيب نتيجة قوى... افصل المية والنور.
9) بالنسبة لمظاهرات التأييد... هى حل كويس.. وأنا معاك إنها أحياناً بتجيب تأثير.. بس لو هتستعين بفنانين حساسين نبه عليهم يمشوا فى جماعات ويستحسن يصوروا المظاهرة فى حديقة القصر بتاعك... هم مش حمل ضرب وبهدلة.... أما لو هتستعين ببلطجية.. بلاش جمال والجو البلدى ده.. هات ميكروباص يوصلهم كلهم وبلاش فضايح.
آخر نصيحة هاقولهالك:
خلى قراراتك بطييييئة على قد ما تقدر... ويستحسن ماتاخدش قرارات خالص.. لأن التاريخ أثبت إنها بتنرفز الشعب أكتر... إنت استنى بتاع شهر كده على ما تكون ظبطت أمورك وظبطت القرشين وامشى من سكات....
ماتخفش.. أنا برده هخليك تسيب الحكم.. اسمع بس..
وفى الآخر.. لو مشيت... بلاش تيجى شرم الشيخ... كفاية علينا واحد مش عارفين نمشيه.
