علشان نجاح الثورة يبان عايزين شيطانا يبات خيبان
ما يجيش ف يوم ويكون كسبان وإن طلنا نجرى وراه بالشوم
علشان نجاح الثورة يدوم بلاش نسيب نفسنا للنوم
ونمد إيدنا لخلق الله ونعيش عوالة يا عيب الشوم
عايزين نصحصح لجل نعيش ونلقى فرصة لـ «لقمة عيش»
وننسى قولة بح مفيش ونبقى ويا الفقر خصوم
علشان نحقق أى وعود والنجم ما يبطلش صعود
عايزين ضميرنا الحر يعود وعن معاصى الدنيا نصوم
عايزين لبعض نمد الإيد ياسين وجورج وجون وسعيد
عايزين شموع الوحدة تقيد مانسيبش نار الفتنة تحوم
عايزين نقصر ف المسافات عايزين نزيل كل الخلافات
يا فرقة عصرك عدى وفات عايزين نكون أحباب م اليوم
عايزين يا شعب الثورة كتير علشان ما نشعر بالتغيير
عايزين يزيد جوانا الخير ده الشر قاسى وكله هموم
علشان ما نسعد كل شهيد عايزين عرقنا يزيد ويزيد
ونخلى مصر يوماتى ف عيد وف نهر خيرها الكل يعوم
عضو رابطة الزجالين وكتاب الأغانى
