اسمح لى أن أشرك القراء فى رسالة عن آثار الثورة وصلتنى على الإنترنت.. لما تلاقى واحد واقف الساعة 7 الصبح ينظم المرور ومش مستنى فى المقابل حاجة.. لما يبقى يوم الجمعة أوله ترانيم، وبعد كدة صلاة جمعة، وبعدها أغانى وطنية وكله فى مكان واحد!!..
لما رئيس وزراء دولة يصلى جنبك ع الرصيف!!.. لما أبوك يقولك «كفاية نت بقى هفصله عنك».. ترد تقوله «إنت عارف آخر واحد عملها عملنا فيه إيه؟»!!.. لما الناس لسه لاقية تأكل فى بلد بتتنهب بقالها تلاتين سنة!!.. لما أبوك يسيب أخبار التليفزيون وييجى يقولك شوفلى يا واد الناس بتقول إيه على تويتر!!..
لما الجيش يبعتلك رسائل على المحمول أكتر من خطيبتك!!.. لما أهلك يفتخروا بيك قدام الناس ويقولو: «الواد اسم الله عليه مش بيرفع عينه من عالفيس بوك!!.. لما العالم كله يتابع السباق الرئاسى فى مصر كأنه انتخابات أمريكا!!.. لما نبقى طول عمرنا بنقول «نفسنا نبقى زى أمريكا».. وبعدين أوباما يطلع يقول «نفسنا ولادنا يبقوا زى المصريين»!! يبقى أنت أكيد فى مصر!!
بورسعيد
