شعب واحد قالوا وقلنا قالها القلب وقالها لسانا
عايزين تفضل عايشة بقوة والروح تعشقها وتتغنى
بس ازاى ده ممكن يحصل لازم نزرعها ف أولادنا
زرعة خضرة بتدى محبة تكبر وتفرع ف بيوتنا
نفرح بيها لما تضلل فوق الكل إحنا وجيرانا
تدى الخير بكتير وبوفرة ويكفينا ويدى لغيرنا
تكبر ويا فروعها البسمة تسعد أيامنا وتسعدنا
ونعيش تحتيها اخوات واحباب والعشرة الحلوة بتجمعنا
وف ليلنا ننام وبنطمن فى حماية الله ومحبتنا
ونكون احباب ما احناش أعداء بطن المحروسة ولدتنا
والعلم ينور ف عقولنا يجمعنا الحب ويصهرنا
فرحى وفرحك يصبح واحد يكبر ويكبر فى قلوبنا
محمود جرجس منك يا احمد وحسين تدرس وتعلمنا
حنا محمد مشوار واحد ودراع واحد ضد اعدائنا
من ماء النيل دم عروقنا نسمة مصر بتحيى صدورنا
أولاد أرض مباركة وطاهرة مش ممكن فتنة تنجسنا
كل الناس من كل الدنيا لما تشوفنا ما تفرقنا
رسم واحد، ولسان واحد رب واحد يهدى نفوسنا
مصر اجدادنا ويومنا وبكره مصر ولادنا وضى عيوننا
رافعين فوق للمجد اعلامنا ابنى وابنك يحمى ترابنا
قوم قولها لكل الدنيا الدين لله والروح لبلادنا
سيدنى - أستراليا
