إحنا غيرنا النظام الحاكم وقلبنا الدنيا فوق راس الفاسدين وغيرنا كل واحد فاسد كان بيحكمنا وبيتحكم فينا.. ودلوقتى.. من واجبنا على بلدنا الحلوة دى إننا نتغير عشانها.. يا مصرى بلاش ندخن فى الأماكن المقفولة ونضايق غيرنا بالدخان.. بلاش نتف على الأرض.. بلاش نعاكس البنات فى الشارع.. بلاش نتعصب ونشتم بعض ونضايق بعض فى السواقة وبلاش نكسر إشارة.. بلاش نرمى زبالة فى الشارع وإحنا ماشيين أو من شباك العربية أو من البلكونة..
بلاش ندى حد إكرامية عشان يخلّص لينا مصلحة ولا نسكت ومنبلغش لو شفنا حد بيرتشى.. خلينا لو بنشتغل فى مكان فيه مصالح ناس نخلصها من غير ما نعقدها.. خلينا نكون مُخلصين فى عملنا أو دراستنا.. نحترم بعض ونحترم الكبار ونحترم أساتذتنا.. خلينا نبطل كسل ونشتغل بجد ونتقى ربنا ونرجع تانى نحب بعض مسلمين ومسيحيين.. خلينا نساعد بعض ونساهم باللى يفيض مننا لحد يكون محتاج من غير ما ننتظر منه مقابل.. صدقونى مصر مش حتتغير غير بينا لو إحنا اتغيرنا مصر كلها حتتغير للأحسن.. بقى أحسن من بلاد كتير كنا بنحلم نعيش فيها.. إحنا ولاد البلد دى وبلدنا حلوة قوى..
تعالوا نشوفها بنتنا أو أختنا أو أمنا أو عروسة حلوة لازم نخاف عليها ونحميها.. ينفع بقى تعمل حاجة وحشة فى أمك أو أختك أو بنتك أو حبيبتك أو حتى جارتك.. مصر محتاجة لكل واحد فينا واللى جاى حيبقى أسهل لو بقينا إيد واحدة وروح واحدة بقلب واحد فى أجساد كتير مختومة بعلم مصر.. أرجوك يا مصرى.. لازم تتغير.. إحنا دخلنا فى عهد جديد لازم نكون أده.. وإحنا أدها وأده.. يا ريت ما ترميش الورقة دى وتديها لحد غيرك يقرأها وغيرك يديها لغيره.
