أنا الشهيد المصرى.. بالدم اسمى انكتب.. النور راسم ملامحى.. والخيط فى كفنى دهب.. أنا اللى مت عشانكم.. مامتش من غير سبب.. مت علشان تعيشوا.. وتعيش حرة البلد.. أنا الشهيد المصرى.. ماكنش عمرى كتير.. واحد عادى زيكم.. أحلامى كانت بسيطة.. أشتغل..
أتعلم.. أتنفس.. وأتكلم.. لا قلت معلقة دهب.. ولا قلت أبقى وزير.. وخرجت اتظاهر بتحضر.. أطالب بالتغيير.. وقلت سلمية سلمية.. ما فيش داعى للتدمير.. اتظاهرت، طالبت... ومت.. بإيد ابن بلدى.. انتهت حكايتى.. وبموتى وشهادتى.. ابتدا التغيير.. أنا الشهيد المصرى.. بالدم اسمى انكتب.. النور راسم ملامحى.. والخيط فى كفنى دهب.. بأمنكم أمانة.. تحافظوا على مصركم.. وتطالبوا بحقكم.. وتوحدوا صفكم.. وثوروا من حقكم.. بالذوق وبالأدب.
