واحد قالها طظ فى مصر والتانى رفع له علامة النصر
واللى بيسرق قوت الشعب يهوذا يساعده بختم النسر
واللى يخالف يطلع بره واللى ينافق يسنده ضهر
واللى يلوث نهر النيل واللى بياكل فرس النهر
واللى بيرمى زبالة العالم جوة العشة ويحمى القصر
واللى بيلبس غمة بدوى واللى دماغه لحسها الفقر
واللى عجوز ولابس له عقال وف حضنه صبايا تحت الأمر
واللى يحاول يسرق خوفو واللى يحاول يسرق قطر
واللى بيسكن جوه صفيح واللى بيسكن جوه القبر
واللى يشم سبرتو وكلة والسوس ينخر جواه نخر
واللى يصلى ويهمل عمله يعصر غيره وبئس العصر
واللى بيحلف ويقول كدب وصحافة تغبرك عند النشر
واللى بيفتى يقول خرافات البانجو حلال وحلال الخمر
ولما هتفنا هلال وصليب فى اليوم التالى شربنا المر
ولما طلبنا شوية ميه واحد منهم شرب النهر
إحنا فشلنا فى صنع الإبرة رغم جدودنا سبقوا الدهر
جبنا منين القلب القاسى ليه بنطارد نور الفجر
غنوا لمصر وبوسوا ترابها قبل ما تندموا يوم الحشر
نجع حمادى / قنا
