بصّيت من ورا الشباك.. لقيت حاجة هنا وحاجة هناك.. لقيت نار قايدة.. وبيقولوا المرّة دى بفايدة.. وراك وراك.. عملوها التوانسة واحنا ساكتين.. من أيام النكسة مطاطين.. جه الدور علينا أخيرا وبكرة جى أكيد.. ولادنا يشوفوا الراحة ويكونوا وطن سعيد.. واربت الشباك شوية.. لقيت السواد مالى الشوارع.. كلاب حراسة بنجوم شمشرجية.. من كبيرهم لصغيرهم صايع.. النفضة المرّة دى خضة بجد.. الجوع قاتل ومالوش رد.. والمعبد بيضيق علينا.. ولازم عليهم خلاص يتهد.. لمحت الحرامى بيتسحب وابنه فى ديله وراه.. وحبيبه الجارد بتاعه محتاس الأمر منه بيستناه.. فتحت الشباك أوى.. حسيت ضى النهار جى.. جريت ع الشارع فرحان..
أخيرا بلدنا شافت ضىّ.. بلدنا اللى جه الحرامى من ضهرها.. اغتصب ودبحها وموتها بقهرها.. بتقوم وتثور للعيش والحرية.. والعطاشة بيرتووا بنهرها.. كسرت الشباك وكل شبابيك الخوف.. ومش هاقف تانى ورا أى جدار وأسوار.. الشباك كان جدار بس مكشوف.. بس واهمين الحما نصرخ كاتمين جوانا صوت الثوار.. كسرنا خلاص الشباك.. كسرنا يا مبارك الشباك.. ومصر هترجع هترجع من تانى.. مش هنخاف ولا هندارى نفسنا ورا شباك.. كسرنا خلاص الشباك.. كسرنا خلاص الشباك.. الحديد والنار والأبواب.. والسدود والحواجز والشباك.. كسرنا خلاص الشباك.. كسرنا خلاص الشباك.. كسرنا خلاص الشباك.
tamerelsaeid@hotmail.com
