ياللى مسكتوا الكرسى بإيديكوا وسنانكو.. ماهوش دايم لكم.. لو دايم ما كان جالكم.. ركبوه ناس قبلكم.. وبكرة يركبه غيركم.. ساعتها ييجى الحساب ويدق على بابكم.. وبيه طمعكم زاد غيرتوا أحوالكم.. أخذت الرخيص والغالى وكله بقى مالكم.. ولا سبته حاجة لحد وده شر آمالكم.. ونسيته كمان ربنا ما جاش على بالكم.. واحلو ف عينكوا الطمع بقى هو عنوانكم.. ما ترحموا المسكين ما هو ف الأساس منكم.. واعملوا حساب ربنا موجود قدامكم.. شايفكو ليل ونهار وقادر على حسابكم.. الكرسى بقى مخلع وبرضه الطمع فالكم.. اعتقوه لأجل النبى ما العز بقى حالكم.. ربنا يكفينا شركم أنتم وسلسالكم..
حرام عليكم بقى وجعتنا أغلالكم.. ناقص إيه عندكم حققتوا أحلامكم.. بلاش تزيدوا الحرام ده شيطان وأكلكم.. وإن افتكرتوا اليوم إن إحنا غزلانكم.. حييجى عليكوا الدور وتشوفوا الأسد جالكم.. وافتكروا ح تقابلوه الموت لو خدكم.. وبإذنه هو الكريم ح يروحوا أشكالكم.. وح تبقوا زى الهشيم ناره ح تاكلكم.. ويومها ييجى الندم ويبقى الألم حالكم.. وأنتم فرحتوا يومين وعيشتوا أيامكم.. نسيتوا يوم القدر ح يجيب ف أحزانكم.. وأنتم زى ما خطفتم وعملتوا ما بدالكم.. حييجى يوم سعدنا ونعيش ف نعمة!!
