قوم اتحرك ماتسكتشِ واقف صامد ما تركعشِ
خلاص الصبر ع الظالم وع السارق ما ينفعشِ
حكومة ماشية بالمقلوب بتديلك بميت مركوب
وباعت المكن والطوب وصابر ليه؟ ما تصبرش
فضيحة الحكم بجلاجل! بيحكمنا نظام فاشل!
ما بين النهب والتزوير طبيعى كل شىء باطل!
وفيه ميت حكم بالبطلان لمجلس من زمان فسدان
وبيشرع وبيقرع وعن حقك بيتنازل
بإيدك دق باب بكرة وخُدلك من الزمن عبرة
وشوف الدنيا سبقاك ليه وليه راضى تكون بقرة
وليه صابر على الكرباج وليه ستسجد لكرسى وتاج
وليه عايز تسيب بلدك وبتفكر تغور بكرة
قوم اتحرك ويكفاك نوم ولازم النهار ده تقوم
عقود أرضك أخدها غريب وف إيديه الورق مختوم
أخدها الأمير ببلاش مضاها لحضرته أوباش
أخد نص البلد سرقة وابنك من قييراط محروم
ما عدش الصبر راح ينفع ولا ناوية الحيتان ترجع
ولو هاتقول هاقوم بكرة نهارك عمره ما هايطلع
بقيت عرة ف وسط الناس وحكمك ميت شيطان خناس
ضلالى ومرتشى وبصباص وشايخ ماشى يتقمع
سنانهم من زمان وقعت وروحنا منهم طلعت
وصبغوا ودبغوا ميت مرة ودورة الزمان رجعت
وتفكيرهم بقى بطال دماغ فاسد وفكر عيال
هدفها تلم وتكوش وف شؤون البلاد لعبت
