خايف عليكى يا بلدى وشايل فى قلبى الهم
خايف لا ييجى اليوم وأبكى بدال الدموع دم
خايف لا يكبر فى يوم جرحك والجرح ما بيتلم
نفسى أشوف فرحك ونور الفرحة يزيل الهم
خايف عليكى من نفسك لا شمسك فى مرة تغيب
ياللى حروف اسمك يعشقها كل حبيب
اسمك أنيس وحدتى فى الغربة مهما أغيب
بلدى يا روح دنيتى بعدك عذاب ولهيب
جسمى نبت فى ترابك وفى حضنك روانى النيل
صعب يا بلدى فى بعادك عينى تنام الليل
يا محلى جمال لياليكى وضى القمر فى النيل
ونخيلك بينادى عليكى والخضرة فى هواك تميل
أصالة وتاريخ وحضارة سابقة الزمان بسنين
صنعوها الجدود بجدارة يسحر جمالها العين
لو مخفتش يا مصر عليكى قوللى أخاف على مين
سيدى بشر - الإسكندرية
