جرجس أخويا زعلان منى.. ناس شاحنينوه وأنا تاهمنى.. معاه متربى وحياة ربى.. أكتر واحد هو فاهمنى.. دا صاحبى وضهرى وزميل جبهة.. حتى فى فرحى بدلتى جابها.. لكن عيبه مخروم جيبه.. عمره معايا فى يوم ما حسبها.. قالى عاوزك أفضفض لك.. كام فضائية وناس بتلك.. قلت له أزمة من غير لزمة.. وشغل أونطة بيملى البك.. ومؤتمرات وعشوة وغدوة.. وبشكل لجنة وأعمل ندوة.. يا بهوات إحنا أخوات.. خفوا علينا يا ناس يا هنادوة.. ما إحنا كنا فى خير قاعدين.. عمر ما فرق بينا الدين.. سيبك منهم قولها فى عينهم.. حنخسر بعض ونكسب مين.. اسمع منى وحياة زاخر.. خليك جنبى إياك تتاخر.. بس يا أفندى حقك عندى.. وبلدك أمك كده من الآخر.. بكرة محتاج إيدى وإيدك.. تواسينى فى حزنى وأقاسمك عيدك.. دقيقنا فى زيتنا ويقولوا.. فتنة الطف بينا داحنا عبيدك.. مصر دى قلب أطرى من الخص.. حضن كبير جواه نترص.. اللى يهينها يطلع منها.. وقطع لسانه بسيف ومقص.
