كل يوم فى اسكندرية.. يتقتل خالد سعيد.. كل يوم الظلم يولد عنف للناس من جديد.. كل يوم الجهل يكبر.. والغباء فى حياتنا يظهر.. كل يوم السجن يضيق.. والأمل يلعب بعيد.. كل يوم الليل بيطول.. يبقى أطول م النهار.. كل يوم الضلمة جاية.. زاحفة تدخل كل دار.. كل يوم أحلامنا تصغر.. واللجام فى حياتنا يكبر.. والشباب عايش فى غربة.. وجوه قلبه قايدة نار.. كل يوم الظلم يكتر.. على الغلابة المحرومين.. كل يوم تقسوا عليهم.. زى ما هى قاسية السنين.. آخرة الجبروت دا إيه؟.. والغباء ده لزومه إيه؟.. بعد ما سرقتوا حياتنا.. وعزمنا هانروح لمين.. كل يوم السجن يكبر.. سور على عموم المكان.. كل يوم ترباس جديد.. تقفلوا بيه اللسان.. حتى أحلامنا البسيطة.. ضايعة فى حياتكو العبيطة.. وكل يوم ليكم قتيل.. والبلد صبحت ليمان.. مش هاتنفع العصاية.. فى كل مطرح ترفعوها.. مش ها تنفع كل نسمة.. عن حياتنا تمنعوها.. آخرة الضغط انفجار.. كل ليل آخره نهار.. والمظالم جاى يوم.. غصب عنكم تدفعوها!!
