عاش الهلال مع الصليب.. عاش الشاى بالحليب.. عاش الإيستبميشن والطرنيب.. يا عم روق دا هيه حدوتة واحدة.. مصر أم الدينا على مر العصور.. شعب شال وحط عشان يخلد عجول!.. تلاتين سنة ع السقالات بيبنوا فى هرم كبير.. داقوا المر عشان نفر لما يموت ينام فى سرير.. وراح الزمن وجه زمن غيره مليان برضه بالغرور.. ولسه بيبنوا لعجولهم الڤلل والقصور.. يا بخت العجول بيهم ويا بختهم بالعجول!.. هى دى الحدوتة يا صحبى.. ناس اختارت.. اختارت تبص للأرض.. اختارت تجوع ولا تقولش لأ.. اختارت تبكى الليالى وتقول يا رب.. يا عم المسلم يا عم المسيحى.. كلنا فى الهوا سوا.. جلنا المرض اللى مالوش دوا.. وآخر النهار كلنا مع بعض ع القهاوى.. بنشرب الشاى بالسم الهارى.. بنرمى الزهر.. وبنلعن الدهر.. يرحم أخويا اللى اتولد فى الدنيا ومالوش ضهر!
