وحدى مع الصحاب.. بلعب وأنا صغير.. ولد عسل سكر.. نجرى ورا بعضنا.. ونتوه من بعضنا.. ويلمنا صندوق الدنيا.. ونلتقى بالعرافة.. تدندن لنا.. من غير شجن.. من غير خوف.. تقولنا.. اللى يعيش ياما يشوف.. حطت لنا.. صندوق الدنيا.. فتحت لنا.. الدنيا ف ثانية.. وحكت لنا حكاية.. من حكايات الدنيا.. الدنيا ضلام ف ضلام.. عناقيد مرسومة أحلام.. والشاب الصغير تايه مع الأحلام.. حزنه مالى عيونه.. من غدر الزمان.. وسكتت العرافة.. سكتت معاها قلوبنا.. إيه هينوبنا.. إيه مكتوبنا.. دنيا بتشتى بتشتى.. وقلبى بيشتى.. والشاب الصغير.. صاحبه ماشى معاه.. فايت حزنه وراه.. مستنى حلم الدنيا.. والآهة مش فايتاه.. ولا قادر يلقى دواه.. وتالتهم برضه صغير.. ف دنيا تايه متحير.. لا عمره ف يوم اتغير.. ولا غيَّر.. وسكتت العرافة.. سكتت معاها قلوبنا.. إيه هينوبنا.. إيه مكتوبنا؟
gar-shakal@yahoo.com
