مسامير مخلوطة بديناميت.. وحقد أسود مميت.. هما سلاحك ياللى.. لخير بلدنا نسيت.. يا أعمى البصر والبصيرة.. الحقد دايمًا مصيره.. يفنى صاحبه حتى.. ولو كان مين نصيره.. وانت نصيرك مين.. ناس.. متطرفين.. بيتاجروا بالإرهاب.. ويحرفوا الدين.. فكرك بكام انفجار.. هتغير.. الأفكار.. وتهدم تاريخ وطن.. والحب فيه ينهار.. طول عمرها مصر.. ومن قديم العصر.. جامع جنب كنيسة.. ومحمد بيحب نصر.. طول عمرنا عايشين.. أقباط مع مسلمين.. بكل حب ومودة.. نسيج قوى ومتين.. مسلم وبقدم اعتذارى.. لأخويا مرقص جارى.. وبقول له قلبى معاك.. ونارك هيه نارى.. قلبى معاك بجد.. ومهما الكرب اشتد.. صوت الأدان والجرس.. هيقولوا يوم الحد.. إن إحنا شعب واحد.. إن إحنا دم واحد.. ولا يمكن عمل خسيس.. هيفرق شخص واحد.
