بلدى.. ومش عارفة أعيش فيها.. مصر اللى بدمى أفديها.. خايفة فى يوم.. ملاقيش الأمان فيها.. فين الأمان؟.. وأنا بنتى بخاف م النوم أصحيها.. خايفة تقولى.. نازلة أصلى.. ودى حأحتار أنا فيها.. فين الأمان يا خلق هو.. متفهمونا!!.. عايزة أغمض عينى.. وأفتكر اللى كان.. أفتكر أيام زمان.. كان بينا حب.. بينا أمان.. مكنش فيه مسلم وقبطى.. دى دخيلة.. بأفطر مع محمد وياسر.. كلنا عيلة جميلة.. وإيمان حبيبتى لما تتعب.. أجرى وأحضنها بإيديا.. لو حتحتاج دمى حتى.. يبقى دمى ده شويه.. إيه اللى حاصل لنا.. يا خلق هو اصحوا.. خافوا على العشرة الجميلة.. خافوا على مصر الأصيلة.. ياللا بينا نحمى دارنا.. دم كل شهيد ده تارنا.. رب واحد.. قلب واحد.. إيد فى إيد نبقى حديد.. إيد فى إيد نقطع الإيد الدخيلة.. نبتر الجزء اللى فينا.. دخيل علينا.. اعتصامنا بحبل واحد.. يرفع الأمة الجليلة.
سابا باشا
