اليوم جميعنا بنتألم.. وجروح فى قلوبنا بتعلم.. ووطننا حزين ع اللى جرالنا.. ولا يحتاج منى أتكلم.. وأهو جالنا درس لكن قاسى.. وآلام بتصيب أهلى وناسى.. محمود أو جرجس مش فارقة.. مصيبتهم حلت على راسى.. وبأقول للإجرام الدولى.. شايف أولادى من حولى.. يقولولكوا: مين من أدياننا.. يسمح بوجودكم.. مين قول لى؟.. ده كلام مش إنشا يا إخوانّا.. دى حروبنا ياما جمعت بينا.. جثة زكريا مع أحمد.. أبطال شهداء ماتوا عشانا.. قوتنا فى بلدنا حضارة.. وتسامح له ألف أمارة.. ومسيحى أو مسلم دايماً.. تجمعهم وحدة جبارة.. وإحنا فى دولة مدنية.. يحكمها قانون (مش دينية).. يعنى لو فيه أى مخالفة.. ينظرها قاضى.. وقضية.. حانعيش مع بعضنا فى وطننا.. ومشاكلنا حانحلها بينا.. ولا ننسى حضارة أجدادنا.. ووحدتنا تحقق أحلامنا.. مين ده اللى حايقدر يخدعنا.. بكلام عصابات مالهوش معنى؟.. لو فاكر ح يفرق بينّا.. حانصب عليه ألفين لعنة.. ودى مصر الغالية على قلوبنا.. لا فى يوم حانسيبها ولا تسيبنا.. ده تراب مصر يفوق الدنيا.. وهلال وصليب من حبايبنا.
gado_arts@yahoo.com
