معلهش يا مصر يا محروسة.. قرفت من ريحة الكوسة.. كان لازم أسيبك يوم وأمشى، والدمعة بتسبق على رمشى.. وأبعد وأنساكى ومندمشى، وم الغربة أبعتلك ميت بوسة.. خارج بدعيلك ادعيلى خارج بالشنطة وهلاهيلى.. هربان فى مركب عز الليل وحابعد عن أرضى وعن نيلى.. وممكن أرجعلك حاجة كبيرة وممكن كمان مرجعش.. وممكن وبعد كام ليلة أرجعلك جثة فى نعش.. تعبان ومتنيل ميت نيلة وعقلى مبيجمعش.. مابقاش فيه حاجة قادر أهضمها ومهيش فضيالى أكلمها.. مهضوم دايماً وياكى حقى على طول محروم ولا بترقى.. وأجرى على حضنك وتزقى وعليا بتعملى فلحوسة.. معلهش يا مصر وسامحينى حابعد وفراقك على عينى.. مش ح أقدر أبداً أرضيكى ولا أنتى ف مرة حترضينى.. وسؤال وسألتك يا عروسة ليه رجلك ف الطين مغروسة.. معلهش يا مصر يا محروسة!!
