كلامنا النهارده كتر ع الفساد ونار المعارضة بتصبح رماد
حكومة وحازمة وبتحل أزمة وعاملة ليكوا هيبة فى وسط العباد
وماشية بعدالة ولو فيه بطالة بتعمل مصانع فى كل البلاد
ومش حتقاضيكم وناوية تراضيكم وتقضى على الفقر لو حجمه زاد
مفيش خطة هايفة مفيش انفلات مفيش حاجة واقفة وفيه إنجازات
وخطتها شاملة وواضحة وكاملة وبكرة حتعرف ترخص حاجات
واصبر يا صابر ماتبقاش مكابر وسيبك من الماضى كله اللى فات
وما تقولشى خابت ورجلينا سابت وكدب ظنونك وشوف اللى آت
حتبقى انت هايص وجنبك جيران مفيش حد لايص وبايت جعان
وتنعم بخيرك وحتقول لغيرك مأثرش فينا وجود الحيتان
ورغم اندفاعنا مفيش حد باعنا ولا اتحط قدامنا واحد جبان
وعايشين فى راحة وحجم الصراحة مخلينا دايمًا نحسوا بأمان
متبقاش تخاطر بلاش اندفاع متعملشى شاطر فى بيت السباع
وحسن فى صورتك ومشى بشورتك وما تثورشى أحسن يجيلك صداع
وشاور بصوبعك وخليك بطبعك ما ينفعشى تلبس لأهلك قناع
بتاع إيه يا خينا ومستقبل إيه ماتسرحشى بينا فى عرضك يا بيه
متشطحشى حاسب وسيب المكاسب وعد الشباب اللى طالع عينيه
وشوف حد غيرنا وسيبنا لمصيرنا بتضحك علينا وتتعبنا ليه
محيت الكرامة بكتر العتامة وعندى البلاوى حاططها ف دوسيه
وتموين زبالة وسكر وزيت وظلم الحسالة دخل كل بيت
وخرب ودشش ولسه معشش فى قلب الحوارى وفى كل غيط
وأغلبنا شايف وتعبان وخايف ليتهد بيته ويلزق فى حيط
وده من خيبتنا وقلت حيلتنا ولو فيه عدالة لكنت اشتكيت
دا ابن الأكابر بقت عيشته طين وصبر اللى صابر خلص من سنين
وعايز الخلاصة ماهياش فراسة وقعنا ف شباك اللى ملهومشى دين
وساءت ظروفنا وقلت ضيوفنا ومن كتر خوفنا نسينا احنا مين
عيشتهم ظلومة ودعم الحكومة وحق الغلابة بيدوه لمين
أخويا الصغير من الهم داخ وموضوعه حير عقولنا وباخ
مخلص علامه ومحفوظ مقامه ومش لاقى يسكن فى عشة فراخ
وغيره فى راحة معمول له واحة وهو اللى عايش فى أسوأ مناخ
بيتحدوا ناسنا وكاتمين نفسنا وواجب علينا نعلوا الصراخ
ونقلق منامهم ونهدم كيانهم ونردم عليهم بكومة سباخ
عضو اتحاد الكتاب
