يا خسارة يا إسكندرية.. على شطك طريق الموت.. كل لحظة نشوف ضحية.. اللى يفوت لازم يموت.. بدل الشكوى كتبنا مية.. ورفعنا صوتنا لأعلى صوت.. لا حد دارى بالمسؤولية.. الوضع أصبح مش مظبوط.. يوماتى نكتب ما نخلى.. لا محافظة ولا مجلس محلى.. والرد معروف تملّى.. ربك يسهل يا عم صلى.. لكل شىء فى الكون أسباب.. المستثمرين صبحوا حنوتية.. الجثة من الباب للباب.. والكفن على الجثة هدية.. غير الروايح والحنة.. وضمان للجثة على الجنة.. الله يبارك فى الكورنيش.. يتّم عيالنا وقّف حالنا.. اللى يعدى يروح ما يجيش.. إمتى ربنا يصلح حالنا.. تعبنا من كتر القول.. نفسنا مرة نشوف حلول.. وبلاش شكاوى على الأوراق.. ناس تعدى من الأنفاق.
