كان نفسى أرضيك
وأزحزح خوف الزمن اللاعب بيك
والكاسر حلمك
أتجول ف غموضك
أستثنى غضبك
أتحمل وياك الدنيا
الواثقة من إحساس الوعى
يأتلف الجسر الواصل بيننا
النابع من إصرارنا
بإننا متحدين بيننا ما بينهم
كان نفسى
أرجع لك إشراقة ورصانة روحك
وشموخ الكلمة ف حلقك
تتكن ف أول صدق يقابلك
وأشاركك ف مرارة / ظلم الخلق
تتوحد رؤيانا
لضميرالحق الصابر فينا عليهم
كان نفسى
اكون فرسانك وميدانك
فلسفتك وعقيدة أوطانك
وساعات الليل لما بيسكن ف دموعك
كان نفسى
أكون فيك الحاضر
والناهى والآمر
والمتآمر وياك على حزنك
والمتعاهد على صحة أقوالك
وأكون لك منهج أفراحك
تتلفع بيا أستر أوقاتك
تلمحنى ف حسن النية
كان نفسى/ تروض لى نفسى
تفككنى عن سلطة مافيا
تفتح أبوابى
تحصرنى بين أبوابك أسوارك وحدودك
مسرحنى جوة مستحيلك
أنا روحى طير
أحيينى من نفحة حياتك
تبرق إشاراتك خلود
نتهجى إجابات الوجود
يتعافى صوت الأبجدية
تتجدد الرغبة الأكيدة للخضوع
تبتدينى وأبتديك
كان نفسى
لكن لسة الأمل الواقف
على أبواب قراراتنا عنيد
بيحول جناحات مسافاتنا بعيد
طايح فينا صراخ اللأ
كان نفسنا يدينا الحق
نبقى لبعض
لكن فرض البعد أوامر
وبقى الكان ف الغيب
مش آمن/ وأنا كان نفسى
كان نفسى أرضيك
وأزحزح خوف الزمن اللاعب بيك
كان نفسى
