عن الجار والجيرة

ضحكة سلف يا عم خلف

قاللى كان زمان الوضع اختلف

طب شوية حنية على دفا

أو حبة إخلاص على وفا

قاللى معدش غير أسية وجفا

معنى الإنسانية من القلوب اختفى

وعن الجار والجيرة

قاللى متجبش سيرة

سكّن مكانهم الحقد والغيرة

فى زمن الفالصو والعِيرة

أما المحبة اللى كانت شابة

عجِّزت حبة حبة

والمصالح بقت أساس

ما بين بعض الناس

حتى الانتماء والحماس

والشعور والإحساس

حسب الطلب وبالمقاس

أما الود والتسامح

معدش له ملامح

والضمير الحى سافر مش جى

الطمع والجشع مالوش زى

لا عاد سعادة ولا راحة بال

من يوم جواز السلطة بالمال

الاحتكار أصبح شعار

الهيمنة باتت مسار

ميزان العدل معدش حساس

مبيفرّقش ما بين دهب ونحاس

والحق منداس بمداس

والظلم م الخد ينباس

نور الشمس لو يوم غاب

أكيد وراه أسباب

كل شىء مقدر بحساب

اسمع كلامى وافهم معناه

لا بيدوم شىء ولا جاه

لكن برغم المر والمعاناة

الأمل فى بكرة ودى سُنّة الحياة