ممكن يا مصر أسالك.. حتة سؤال يمكن يا مصر يزعلك.. مستقصدة ليه اللى دمه بيعشقك؟.. وبتحبى ليه كل اللى كارهك؟.. واللى فى كل مناسبة شاتمك؟.. واللى عمره ما حس بيكى؟.. واللى عمره ما صان جمايلك؟.. يا حبيبة: هيه طيبة؟.. ولا حاجة من حاجاتك الغريبة؟.. ويا مصر فيه برضه سؤال بس من غير زعل.. إنتى ليه ساعات بتدينا الأمل.. وتحسسينا ساعات بإنك حاسة بينا.. وبترسمينا فى كل حلم بدون خجل؟.. وساعات نحس بإننا مش ولادك م الأزل؟.. ولا فينا راجل مالى عينك أو مناضل أو بطل؟.. يا حبيبة: هية طيبة؟ ولا حاجة من حاجاتك الغريبة؟.. وسؤال أخير وصدقينى سرك فى بير.. إنتى الكبيرة فى العرب؟.. ولا فيه غيرك كبير؟.. إنتى ليه نيلك موزع ميته متساوية.. على ناس ذكية وناس غبية.. وناس تقية وناس شقية.. وناس بخيلة وناس سخية.. وناس بسنجة وناس بمصحف.. وناس بتدى وناس بتخطف.. وناس بذمة وناس بدون.. وناس ودان وناس عيون.. وناس بتاكل مال النبى.. وناس بترهن كل حاجة لأجل ما تزور النبى.. يا حبيبة: هية طيبة؟ ولا حاجة من حاجاتك الغريبة؟.
