قالوا انتخبوا صوتكو أمانة.. وبلاش تكونوا ناس جبانة.. وحياتكو فى أيدى أمينة.. عزتكو وكرامتكو مصانة.. هنريحكوا من التفكير.. هنعرفكم مكان الخانة.. غمضوا عنيكو عن التزوير.. اسكتوا مهما شوفتوا خيانة.. وطنى وطنى واللى هيرفض.. لا مكان عندنا ولا مكانة.. وطنى وطنى واللى هيشكو.. هنلفق له ولأهله إدانة.. صوت الموتى أخرجناه.. لا يهم سياسة ولا ديانة.. صوت المسافر رجعناه.. لا تهم أمريكا ولا إعانة.. أسكتنا معارضة وإخوان.. أرعبنا وضربنا فنانة.. زرعنا فى قلوبكو مطاوى.. وحصدتوا بلطجة وإهانة.. مالنا إحنا والانتخابات.. فين العقل؟ فين الرزانة؟.. صوتنا أمانة!! هنخبيه.. ووجودنا فى بيوتنا صيانة.. ولك الله يا شعب مصر.. لك الله.... أرض الكنانة.. ناس تتألم واكلة تراب.. وناس تتنعم واخدة حصانة!
مهندس
