كخ يا واد كده عيب كده كخ.. لازم حد يقولك بخ.. بلوة ف بلوة يا ابن الدولة.. بص أمامك وانظر حوله.. اركع.. ارضع مر كِعانك.. خش الجحر.. أنا عاملة عشانك.. فيه تدفّا.. فيه تتقفا.. فيه تتخفا ف شكل حمار.. خليك ضحى أو عمنا جحا.. ولا لوريل وعلى الكسار.. كيميا.. حشيش.. ستات وهزار.. عايز تلعب قط وفار.. وماله.. تعالى فران بالباله.. هوبا.. أوبا.. خدوه يا رجاله.. اضرب.. اقتل ولا أبهدل.. كسر عينكوا دراعى اتخدل.. أدفس.. أسحل.. عندى مشكل.. للى يبوأ ويقول لأ.. واللى يفكر يطلب حق.. طاخ على «إيدك» طاخ على «.....».. ولا بلاش علشان السمعة.. قوم يا سى جمعة.. نصلى الجمعة.. وياللا يا مريم ع القداس.. ده أنا محتاس ف بلاوى الناس.. ادعوا معايه أكون كناس.. أكنس.. أمسح.. أشطف.. وألمح.. أى زبالة وأى قوالة.. تيجى ع السمعة تشوه صورة.. عندى جاروف.. وعصاية بأوره.. للى ما يسمع كلمة كخ.. بس يا شاطر.. عيب كده..نخ.
