خلصت زفة الانتخابات والتعلب أهو عدى وفات
بكتابة على حيطان وهوسة فى ميكروفونات
وسطينا أحد ما ينجح بعديها يبلغ إفلات
ما خلاص النائب أصبح من طبقة الباشوات
وتدوّر عنه بإبرة يدارى ف سفريات
وسايب أهل الدايرة مشاكلهم شىء وشويات
نحتاج... له مرة ف خدمة نلاقيه عديم خدمات
وفالح بس يقبض ألوفات بدل جلسات
مدارى جوه حصانة تحميه م الجنايات
ح يبص ليه لهمومنا واحنا يا دوب حبة أصوات
نفتكره لما ح ينجح ح يحل كل الأزمات
أتارينا شربنا المقلب وندمنا ع الهتافات
والتعلب أهو عدى وفات
القاهرة - المعادى
