مكتوب عليا إنى أقابل.. أصناف من الخلق كتيرة.. المتهم فى قضية ضرب.. والمتهم فى قضية سب.. والمتهم فى قضية نصب.. واللى مخالف التسعيرة.. واللى فتح قرن حماته.. لما اتخانق ويا مراته.. مسكين بيضيع فى حياته.. من شرب النيلة والبيرة.. وشحط طوله ييجى مترين.. وواد سوابق رد سجون.. ويدعى إنه مسكين.. وراح ضحية الغيرة.. وناس غلابة وفى حالهم.. الحظ فجأة إدالهم.. واتغيرت كده احوالهم.. من بيع الصنف فى تعميرة.. وشاب فافى ما تعرفلوش.. إن كان ده راجل والا ملوش.. واد من ماركة حلق حوش.. ويقول دانا عيلتى كبيرة.. وبومبوناية ملبسة.. مضبوطة اهى متلبسة.. شبكة دعارة مؤسسة.. على مستوى دولى خطيرة.. وست تشوفها محترمة.. لابسة شياكة ومحتشمة.. وهى آل بنت الهرمة.. نشالة ماليها نظيرة.. والكل يقولك أنا مظلوم.. ولا عمرى أفكر ابدًا يوم.. إنى أكون أبدًا مسجون.. فى تهمة مشينة وحقيرة.. قولوا لى بس بصراحة.. إزاى حادوق طعم الراحة.. وانا ما اخدتش يوم راحة.. ولا إجازة مدة كبيرة.. صحيح من البدلة الميرى.. باخد مزايا من غيرى.. لكن تعبت فى تفكيرى.. حالتى بقت صعب عسيرة.
