بيقولوا اتبسم وأتفاءل.. أتفاءل طب بس إزاى.. إذا كنا يوماتى بنتعذب.. ويا ويلنا من بكرة الجاى.. راح نحلف إن احنا أكلنا.. وشربنا بالسكر شاى.. نترحم على زمن الكشرى.. ونقول للبامية باى باى.. ماشيين من أزمة إلى أزمة.. وحياتنا كلها أزمات.. من غاز للسكر للقمحة.. ولا شاغلة دماغها الحكومات.. إيه يعنى لو نصبر حبة.. سنتين أو عشرة وعشرات.. إيه يعنى هانموت من جوعنا.. إيه يعنى كام مليون مات.. مابقاش فيه حاجة تفرحنا.. ولا شىء يسعدنا ولو يوم.. الهم بيقتل أفراحنا.. كوابيس فى نهارنا وفى النوم.. الضلمة شبه الصبحية.. والسكر بقى طعم التوم.. المر القاسى زهق منا.. وطالبنا من نومنا نقوم.. والأعجب فيه ناس فى بلدنا.. أملاكهم نص المعمورة.. وأملهم فى النص التانى.. وبكدة تكتمل الصورة.. أما احنا فكبيرنا نبحلق.. أو نرضى ونقول مستورة.. دول أخدوا الديك ويا الفرخة.. وسابولنا البيضة المكسورة.
