عن موضوع الانتخابات.. صرح مصدر موثوق فيه.. إللى بيحصل دا حركات.. واللى نطوله ح نلعب بيه.. بنزوق فى كلامنا ونكدب.. ونتعب ف دماغنا ونحسب.. والدولارات على بره يابيه.. أصل أنا مصدر موثوق فيه.. ح أتمحك وأجيب تواقيع.. م الوزرا واتاجر وابيع.. وح اسلك كل المواضيع.. وضميرى اترحمت عليه.. ح أهريهم تسقيف وموافقة.. واهبش واجرى من غير شفقة.. أمال إحنا بنتعب ليه.. أصل أنا مصدر موثوق فيه.. قالوا نخصص يبقى نخصص.. قالوا نقصقص يبقى نقصقص.. قالوا نمُص ف دم الناس.. أول واحد أقوم وأمصمص.. عايزين لنا حبة عمارات.. ومعاهم حبة شاليهات.. ملعون الفقر ولياليه.. أصل أنا مصدر موثوق فيه.. ح نفبرك حبة قوانين.. علشان نلعب يحلا اللعب.. ونهرب بودرة وهروين.. ونظبط ف مزاج الشعب.. لازما كله يبات مسطول.. ومافيش حد يكون مشغول.. عايزين اكتر من كده إيه؟.. أصل أنا مصدر موثوق فيه.
