حدارجة بدارجة من كل عين زارجة.. خيال المآتة حبظلم حتاتة.. بقالة نصيب.. واسمه صار قريب.. من الناس الكبار.. نويت أدبح دبيحة.. من عين ماجدة وسميحة.. وجوزها المستشار.. قال بيقولوا إنه زور.. وجاب الأسطى أنور.. إداله رشوة قال.. ظبط العيال.. وراح لأم نوال.. وقال لها أأمرينى.. طلباتك جوه عينى.. ولما صوتها جاله.. قالوا ندل وراح لحاله.. لا عبر ده ولا دى.. ويمين أفقد ولادى.. حتاتة مية مية.. والناس المفترية.. بيقولوا إنه خدها.. بشوية بلطجية.. والنعمة حتاتة خايب.. ملوش ف الصعبجية.. وليلته كات نزيهة.. مفيش ولا غلطة فيها.. غير حبة ضرب نار.. ولولا دمه فار.. مكنش طلع حمار.. وادى مرشح قصاده.. بمطواة تحت باطه.. قضت عليه ف الحال.. كان حلمه م الحضانة.. إنه ينول الحصانة.. وينام على كنز عال.. حسدوك عشان القبة.. إلهى يجيكوا كبة.. ملحقش يكون حاميها.. ولا يغرف م الشوال.
