فى الغربة قلبى حنلك.. وحشنى نيلك.. قولت أما أجيلك.. أبوس ترابك.. رجعتلك.. بس الغريب لقيت وشوش غير الوشوش.. الحزن مرسوم عالوشوش.. مش ديا مصر؟ ولا الطيارة جت غلط؟ كلام الناس زى الزلط.. سألت إيه اللى جرى.. قاللى إنت مين؟..
حلفت له ييجى 100 يمين.. أنا بلدى مصر.. بلد الفنون.. والست ساعة العصر.. بلد الهرم والمشربية.. واتنين حبايب فى المغربية.. صوت الكنيسة والأدان.. ضحك وقاللى.. دا كان زمان.. لفيت وقلت له سلام.. قاللى لفين؟ قلت هاشوف ولاد بلدنا الطيبين راحوا لفين.. هامسح بإيدى تراب سنين.. يمكن تعود البسمة تانى تترسم.. مع شعر نجم وصوت منير.. يصحى ويعلى صوت ضمير.. قولوا آمين.
الجيزة
