فى جنازة المجلسين كان العزا واجب
وسهرت أغالب فى دمعى ودمعى بيغالب
وصبحت أعزى الوطن وامسح دموع الناس
ومشيت مع المقهورين مع بعض نتعاتب
سألونى مين يا ترى الجانى والقاتل
الشعب هو السبب ولا النظام فاشل
ولا الطمع والجشع سيطر على الحكام
وخلى كل الحيتان على كرسى تتقاتل
لو كانوا دول السبب طب فين دور الشرطة
اللى لولاد البلد بتهيج على غلطة
وشيخ عموم البلد كان مستخبى فين؟
اللى دبح للغلابة كل يوم قطة
قالولى شيخ البلد والس مع العمدة
باعوا ضميرهم وباعوا العدل من مدة
وقالوا سوق النخاسة من زمان مفتوح
وكرامة الناس بقت فى مخازن الخردة
زادت همومى وزاد الحزن على قلبى
وناويت وأنا فى العزا أحلق كمان شنبى
لما لقيت الشباب ماشى لابس طراطير
وشيوخ كتير فى البلد عارفة وبتخبى
بيقولوا لسه كمان فى السكة جى قتيل
هايمثلوا بجثته شلة من المخابيل
يانلم أهل البلد ونقف نحوش عنه
ياكل شاب وولد يعمل لنفسه ديل
