أصل أنا حدوتة مصرية.. حياتى أبسط مما يكون.. من قرية ف الريف صعيدية.. عايش حياتى ع المضمون.. مفهاش أمور سياسية.. أنا أصلى طيب وابن أصول.. ولا كنت يوم وش أذية.. ممكن ساعات أكون غضبان.. بس الأسية دى منسية.. أصل أنا حدوتة مصرية.. ودخلت علينا الانتخابات.. وماليش بطاقة وردية.. شوفت الكشوف كلها حكايات.. والموتى صوتوا بالنية.. والحاج عبده راح للزراعات.. ما هو علموله الأفندية.. اطبخ ورينا الطبخة يا واد.. ولا فيش رقابة قضائية.. أصل أنا حدوتة مصرية.. شارد وتايه وسط الكون.. وساعات بحس بسلبية..
لكن الحقيقة إن أنا مظلوم.. الفرصة مش ف إيدى قوية.. ما الكوسة ملت الدنيا ف يوم.. غير الضماير مرمية.. دى الكوسة من غير أى ظنون.. فخر الزراعة المصرية.. أصل أنا حدوتة مصرية.. حدوتة مثيرة مسلية.. ترسم ف وجوهكم ابتسامات.. وفى واقعها دراما تراجيدية.. ولو جينا لدايرة الاتهامات.. صفحاتها كتيرة وملغية.. أيوه أنا خايف م الصراعات.. وحياتى كلها سلمية.. مع إن اللى يخاف م العفريت.. يطلعله ف عز الضهرية.. أصل أنا حدوتة مصرية
. القوصية - أسيوط
