مش مهم إنك تقولى.. النهارده اليوم طويل.. والتعب أثر ف نفسك.. والبدن أصبح عليل.. ياما كنت كتير بأقاسى.. وانتى صبرك كان قليل.. لما يوم فكرت أقولك.. ارحمى جسمى النحيل.. واتماديتى ف التحدى.. لما أصبح مستحيل.. إنى حارجع يوم وأحبك.. واللا قلبى ف يوم يميل.. ولا حاغفرلك وأسامحك.. واللا حابقى ف يوم ذليل.. حتى قمت اسمع ف صوتك.. زى صوت الخيل صهيل.. وأما أبص ألقى ف عنيكى.. نقطة حمرا ف بحر ليل.. قمت أحس إنك غريبة.. وأن طبعك مش أصيل.. وأن عزة نفسى تمنع.. أنى أكون إنسان ضئيل.. النهارده الجرح غاير.. والدوا هو الرحيل.. ارحلى عنى وسيبينى.. واتركينى للسبيل.. كل واحد له طريقه.. حتى لو مالهوش خليل.
