كلامى مش هيعجبهم.. هايعجب بس ناس منهم.. لا أنا عارف أكلمهم.. ولا قادر كمان أصبر.. يا صاحب سلطة فى مكانك.. وواسطة لكل أعوانك.. وناسى اللى مالوش واسطة.. ومايهمكش مين ينذل.. يا صاحب مال وليك دنيا.. ورق ونحاس وألمونيا.. فلوس مش قصدى سكسونيا.. ودايس على لحم ودم.. يا صاحب مهنة اتقنها.. عشان الرزق جاى منها.. ولو فيه عيوب تبينها.. ومتسيبش لضميرك هم.. يا كايل طب بميزانك.. وبالبركة يزيد مالك.. حلال هتشوفه فى عيالك.. حرام تأكل عيالك سم.. يا تاجر والتجارة حلال.. بقيت منها رجل أعمال.. ما تنساش إن فيه أعمال.. رصيد قبرك زيادته أهم.. ونفسى أكلم الحاكم.. مراتى قالتللى تتحاكم.. أنا عايز أشيل وياه.. عشان المشكلة تنحل.. تقيل الحمل على واحد.. أى قرار هيتاخد هيبقى معادى ومهاود.. يوقف ناس وناس تنشل،.. ومين منا ما مهوش غلطان ما هو زينا إنسان.. ومن الشيلة أكيد تعبان.. وصعب عليه يراضى الكل.
