الحلوة قامت تعجن فى الفجرية.. لا لقت دقيق ولا لقت ميه.. الميه قاطعة من زمان.. والدقيق مش عارفه له عنوان.. واحتارت الصبية.. قالت الدقيق تمنه غالى.. وضرورى.. لعيالى.. ومهية الراجل مش مكفية.. أروح لمين أشكيله حالى.. إزاى أأكل عيالى.. يا حكومتنا الذكية.. الحكومة قالت هاعمل إيه ولا إيه.. ماتخفوا م الخلفة شوية.. وتنظيم النسل واجب.. وكفاية م العيال اتنين.. تبقى الحياة وردية.. دى فلوسنا يا ناس.. راحت ع الدقيق والدعم خلّص ع الميزانية.. حتى الفلاحين هجروا الزراعة.. وسهرانين طول الليل مع التمثيلية.. قالت الصبية طب وأنا مالى.. إزاى أربى عيالى والعيشة غالية علىّ.. اللحمة خلاص هجرناها.. والفراخ خاصمناها.. وعايشين ع الفول والطعمية.. والسكر بسبعة جنيه.. والزيت الغلبان مش لاقيه.. هانعمل إيه يا زكية.. أمانة عليك أمانة.. يا حكومتنا الذكية.. تشوفى لنا حل فى الأيام الجاية.
مدير عام سابق
