سيبوا الكلام يطلع من بين الضلوع.. سيبوه يرقص يغنى.. يعزف لحن الحقيقة بصوت مسموع.. سيبوه ياخد براحه.. يفرد جناحه.. يرفرف فى كل الربوع.. دا الكلام مشتاق للورق.. بيتوحم ع السطور.. جوانا الكلام مسجون.. بيرفس زى الجنين.. عايز يشوف النور.. جوانا الكلام.. بيبكى مش لاقى دموع.. موجوع.. خايف م العطش والجوع.. متكبل بقيود الخوف.. متحاوط بألف سور.. جوانا الكلام مخنوق.. خايف يلاقى القلم مشنوق.. يلاقى الورق محروق.. لما الكلام يعيش الغربة بين ناسه.. تنكتم أنفاسه.. ينقتل إحساسه.. تجف من حبره العطور.. يصبح الإبداع حزين.. يندبح نلقاه دفين.. شمس الحقيقة تنطفى.. وتدوب الشموع.. ونتوه ف سكة الجهل.. ونغرق فى الضلام.. ينكسر مجدافنا.. تنكسر كل المراكب والقلوع.. ونصرخ فى قلب البحور.. لا نقدر نواصل.. ولا نعرف رجوع.. سيبوا الكلام.. يطلع من بين الضلوع!
