اصحى يا بنى يلّا فوق.. حب يلّا يلّا روق.. رومى أهه كل يا ابنى.. لحم ضانى خد ودوق.. والمحمر والمشمر.. ارمى يلّا المسلوق.. ده الدستور عدلوه.. م النهارده مفيش طعمية.. ارمى ارمى الطاسة ديه.. مفيش بدنجان هنقلى.. ولا طبيخ من غير تقلية.. ده الدستور عدلوه.. الشوارع بقت مراية.. سكة رايحة وسكة جاية.. من غير إشارة من غير مرور.. كله فاهم الحكاية.. ده الدستور عدلوه.. الطابونة مليانة عيش.. كل يا ابنى يلا عيش.. ولو قلت ميت رغيف.. مش هتسمع لأ مفيش.. ده الدستور عدلوه.. والموظف فى السرعة إيه.. أوراقك أهه يا بيه.. مفيش درج ينفتحلك.. ولاحد تتحايل عليه.. ده الدستور عدلوه.. مفيش أزمة تانى.. ولا حد يتألم يعانى..
والحكومة الغالية أهيه.. هتحقق كل الأمانى.. ده الدستور عدلوه.. مفيش عبّارة هتغرق.. ولا حد لبنوكنا هيسرق.. والناس فى أحلى عيشة.. ومفيش مواطن هيزهق.. ده الدستور عدلوه.. مفيش قطر شقلباظ.. ولا جرار م الشد باظ.. ولا يوم قطر ولع.. ولا تقرير للكل غاظ.. ده الدستور عدلوه.. والوظايف نتنافس عليها.. الشعب كله له حق فيها.. مش حكر يعنى للمناصب.. دى مصر لينا واحنا ليها.. ده الدستور عدلوه.. الحقوق للكل راجعة..
والقضاة عاملين مراجعة.. وف يومين حقك يجيلك.. انتهى عصر الملاوعة.. ده الدستور عدلوه.. والمساكن شققها إيه.. قرب قوامك خد يا بيه.. شقة ليك فى أحلى عمارة.. من غير ما تدفع يوم جنيه.. ده الدستور عدلوه.. المرتب كبروه.. بالدولار غيروه.. وإن جالك يوم جنيه.. العن عيشة أبوه.. ده الدستور عدلوه.. الميه فى الحنفية عوم.. استحمى اغطس وعوم.. واشرب يلا قربع.. من غير ما تدفع المعلوم.. ده الدستور عدلوه.. إسرائيل مليانة خوف.. اسعى اسعى بص شوف.. بالسلاح والعزيمة.. أى عدو يبقى خروف.. ده الدستور عدلوه!
إدارة المطرية التعليمية
