متفاتة يا دنيا متفاتة.. أيام بتمر وفيها المر.. وأيام بطعم الشيكولاته.. متفاتة يا دنيا متفاتة.. علمتينا وحنفضل فيك نتعلم.. يوم نفرح ويوم نتألم.. ويوم عليه بنتكلم.. متفاتة يا دنيا متفاتة.. ناس عليكى بتدخل وناس منك بتتخرّج.. وناس وخداك جد وناس فيك بتهرج.. وناس نازلة شغل وناس شغلتها تتفرج.. متفاتة يا دنيا متفاتة.. ناس فيك تعبت من الراحة.. وناس فى صحاركى بتدور على واحة.. متفاتة يا دنيا متفاتة.. والكل فى الآخر بيتساوى.. سوا عاش فقير أو عاش فى غناوة.. متفاتة يا دنيا متفاتة.. يا معدية رايحة البر.. وسنينك برضه معدية.. فى عرض البحر أو فى ممر.. بتأدف مراكبية.. ناس ضحكتها عالية وناس بالهم مبلية.. متفاتة يا دنيا متفاتة.
